زين العابدين ٺٽوي، سيد: اديب ۽ فارسي شاعر سيد زين العابدين عرف مير لطف الله، ٺٽي جي بزرگ سيد علي شيرازيءَ جي خاندان مان هو. علم ۽ ادب ۾ ٺٽي سميت سڄي سنڌ ۾ گھڻو مشهور هو. ٺٽي جا ماڻهو سندس علمي ادبي اهميت کي تسليم ڪندي گھڻي عزت ڪندا هئا. ٺٽي جي حاڪمن سان سندس دوستاڻا تعلقات هوندا هئا. هو پنهنجي دؤر ۾ ٺٽي جو وڏو عالم سمجھيو ويندو هو. هن ڪيترائي ڪتاب لکيا، جن مان سندس عربي تصنيف ’حرز البشير‘ ۽ فارسيءَ ۾ شاعريءَ جو ڪتاب ’ديوان قانع‘ گھڻو مشهور آهن. پاڻ شاعريءَ ۾ ’قانع‘ تخلص ڪتب آڻيندو هو. هن 1719ع ڌاري وفات ڪئي.